Reshjet e dendura të shiut krijuan sërish kaos dhe bllokim masiv në Tiranë. Qytetarët kanë mbetur në trafik për orë të gjata, ndërsa u bllokuan akset rrugore kryesore të qytetit sikurse rruga e Elbasanit, kryqëzimi i Don Boskos, rruga e Kavajës, rruga e Durrësit, rruga Siri Kodra, kryqëzimi i 21 Dhjetorit si dhe rrugët hyrëse dhe dalëse të zonës së Astirit.
Pamjet satelitore nga “Google Maps” tregojnë se thuajse i gjithë rrjeti rrugor i kryeqytetit mbetet i paralizuar, ndërsa përmbytjet e rrugëve kanë vështirësuar dhe kalimin e këmbësorëve.
Sipas përfaqësuesve të Shërbimit Meteorologjik Ushtarak mëngjesin e sotëm, vetëm brenda një ore reshjet arritën në 13 milimetra. Qytetarët ndanë në rrjetet e tyre sociale situatën e rënduar në lëvizje dhe trafikun e krijuar në qytet, përmes videove dhe fotove.
Ndërsa platforma Acu Weather tregon se në Tiranë shiu arriti 14 milimetra, me nje total të reshjeve prej 5 orësh.
Në zonën e Astirit, qarkullimi u bllokua dhe vështirësua për më shumë se një orë.
Ali Demi nën ujë:
Gazetari Osman Stafa ka mbledhur video të ndryshme nga qytetarët të postuara sot në rrjetet sociale për situatën e krijuar nga rreshjet e shiut.
Gazetarja Ola Xama postoi në rrejtin e saj social “Facebook” trafikun e rënduar në kryeqytet.
Kjo është hera e dytë brenda pak kohësh që Tirana paralizohet nga shiu. Pak ditë më parë, të premten e 3 nëntorit, rrugët e përmbytura, dalja e Lanës nga shtrati, bizneset e përmbytura dhe trafiku i rënduar ishin një realitet që sollën dëme të konsiderueshme.
Bashkia Tiranë bëri thirrje për kujdes dhe uljen e lëvizjeve të panevojshme.
Probleme në qarkullim, përmbytje dhe dëmtim të banesave janë shfaqur edhe në qytete të tjera të vendit, sikurse në Vlorë dhe Mirditë.
Erisa Kryeziu ka përfunduar studimet e larta në Gazetari dhe Komunikim dhe Master Shkencor në Marrëdhënie me Publikun në Universitetin e Tiranës. Prej pesë vitesh është gazetare dhe menaxhere e projekteve pranë Citizens.al, ku raporton për çështje sociale dhe të drejtat e njeriut, veçanërisht për çështjet e të drejtave në punë, në arsim, barazinë gjinore, grupet e margjinalizuara, personat me aftësi të kufizuar si dhe për çështje mjedisore. Njëkohësisht punon edhe si koordinatore projektesh me fokus rininë dhe edukimin mediatik. Përdoruese e teknikave të reja të raportimit sikurse “Mobile Journalism” dhe e mjeteve të angazhimit qytetar në raportim (ECR-Engage Citizens Journalism).
