Citizens.al

Faqja ëshë në ndërtim

Dy projekte, shtatë vite, akoma pa terminal te kthesa e Kamzës

Problemet me pronësinë e tokës po mbajnë peng prej 7 vitesh ndërtimin e terminalit të autobusëve tek kthesa e Kamzës. Bashkia e Tiranës, që nga viti 2017, ka hapur dy procedura të majme tenderimi, por asnjëra prej tyre nuk ka mundur të finalizohet.

 “Si çdo gjë që bën Bashkia e Tiranës nakatoset politika, nakatosen gjyqtarë me masa sigurie, me letra false
hipotekash, me copa dhe çibanë të legalizuar ndër vite, por më në fund është sqaruar dhe ajo situatë dhe fillojmë dhe terminalin e madh te kthesa e Kamzës” – tha kryetari i bashkisë Erion Veliaj më 24 korrik 2022, duke sugjeruar se ishte zgjidhur çështja e pronësisë.

Sot, dy vite më pas duket se situata ende nuk është zgjidhur pasi ndërtimi i terminalit verior për transportin publik është shumë larg përfundimit. Këtë e konfirmon dhe vetë Bashkia Tiranë në një reagim ndaj redaksisë së Citizens.

“Për shkak të disa problematikave jemi akoma në fazë lirimi total të sheshit të ndërtimit, i cili është pronë e Bashkisë” – thotë Bashkia Tiranë.

Më janar të 2020 të gjithë autobusët e linjave të veriut dhe jugut u zhvendosën nga zona e njohur ish – Dogana te “Kthesa e Kamzës”, pas rinisjes së punimeve tek Unaza e Madhe.

Edhe pse janë dhënë 820 milionë lekë për tenderin e fituar nga “NOVA Construction 2012” shpk – “Ante-Group” shpk , mungojnë edhe kushtet më minimale të pritjes si stola, tualete, bankomat, biletari etj.

Nga platforma Open Data, ky tender është shënjuar me flamur të kuq, për shkak të skualifikimit të gjithë operatorëve konkurrues përveç fituesit.

Projekti “Ndërtimi i Terminalit Verior të Transportit Publik, Tiranë” ishte i parashikuar të përfundonte për 24 muaj kalendarik, çka do të thotë më 23 nëntor 2024. Teksa jemi pak muaj larg nëntorit në këtë terminal nuk ka nisur ende asnjë punim.

Dy projekte, e njëjta problematikë

Procedura e parë ishte një koncesion i vitit 2017, “Partneriteti Publik Privat Për Hartimin, Ndërtimin, Financimin, Operimin, Mirëmbajtjen dhe Transferimin e Terminalit të Transportit Publik Tiranë”.

Sipas Bashkisë Tiranë, terminali do të ndërtohej bazuar mbi një procedurë DBOT (Design, Build, Operate,
Transfer) ose “Projektim, Ndërtim, Operim dhe Transferim” dhe procedura do t’i lejonte ndërtuesit privat që të mblidhte të gjithë tarifat e hyrjeve/daljeve të autobusëve, të ardhurat nga qiraja me pakicë dhe tarifat e parkimit, në mënyrë që të amortizoheshin kostot kapitale fillestare, kostot operative dhe për të mbuluar shërbimin e borxhit.

Kohëzgjatja e koncesionit, sipas parashikimeve të studimit, do të ishte 35 vite dhe kishte një kosto prej 2 mld lekë. Por pa u nënshkruar kontrata, koncensioni i fituar nga “SALILLARI” SHPK & “HELLAS SERVIS” SHPK & “ANALYSIS COMPUTER” & “SERVIS SA” & “Klodioda” SHPK, u anulua.

“Komisioni gjithashtu kreu një proces të gjatë e të detajuar negociatash të Kontratës PPP, procedurë e
cila nuk bëri progres për shkak të disa mospërputhjeve faktike të lidhura me pronën në të cilën do të ndërtohej Terminali. Për pasojë në Shkurt 2019, Komisioni vendosi ndërprerjen e procesit të nënshkrimit të kontratës” – konfirmon Bashkia Tiranë.

Megjithëse nuk ka zgjidhur ende çështjen e pronësisë, në vitin 2022 bashkia e Tiranës zhvilloi një tjetër tender për ndërtimin e këtij terminali.

Projekti aktual pas përfundimit të tij, do të duhet ti shërbejë 34 destinacioneve për zonën qendrore dhe
jugore, si edhe 19 për zonën veriore të Shqipërisë.

“Terminali Verior parashikon 2 tualete (me 24 WC) si dhe 1050 vende pritëse për pasagjerët” – përfundon Bashkia Tiranë.

Deri atëherë qytetarët dhe 15 milionë turistët do ta përdorin terminalin në kushtet aktuale, që janë jashtë çdo standardi.

Autobusët për në Kosovë “xhiro” fillimisht në TEG

Ndryshe nga terminali verior, terminali i juglindjes tanimë është funksional. Gjithashtu me zvarritje në
kohë, i parashikuar të ishte në funksion brenda 2022, nisi punën në nëntor të 2023.

Linjat e transportit në këtë terminal lidhin Tiranën me qytete si Elbasanin, Librazhdin, Prrenjasin,
Pogradecin, Korçën, Bilishtin dhe Ersekën. Më përpara autobusët e këtyre linjave ndodheshin pranë “Qytetit Studentit”.

Me kushte moderne, kafene, tualete dhe stola pritje, ajo çka vihet re është së të gjithë pasagjerët e
këtyre linjave gjatë orareve pritëse mund të shfrytëzojnë ambientet e qendrës tregtare TEG.

Pa asnjë arsye logjike, edhe linjat e transportit për në Kosovë janë zhvendosur te ky terminal, ndërsa deri përpara pak kohësh qëndronin tek pallati sportit “Asllan Rusi”. Duke mos e kuptuar arsyen e shtimit të
kilometrave për pasagjerët e Kosovës, e vetmja arsye bindëse mbetet të jetë shndërrimi i tyre në konsumatorë të qendrës TEG.

Regjistrohu në Buletin (Newsletter)

.

Të Fundit

Leave a Reply

Your email address will not be published. Required fields are marked *