“Shqipëria i thotë jo krimit” ishte slogani që bëri bashkë dhjetëra qytetarë, të cilët protestuan pasditen e së mërkurës para Ministrisë së Brendshme në Tiranë.
Pasi u grumbulluan para Ministrisë ata mbajtën një deklaratë, e cila ishte shkruar në disa fletushka që u shpërndanë nga të pranishmit.
“Krimi po na pamundëson jetën normale,” – tha Gentjan Serjani, aktivist i “Drejtësi Sociale” pjesëmarrës në protestë.
“Atentatet mafioze në rrugë, pazar, sheshe, në mes të ditës dhe në injorim të plotë të organeve të rendit, po e bën gjithmonë e më të pasigurtë jetën e secilit prej nesh,” – vijoi më tej Serjani.
Pasi mbajtën deklaratën ata ndezën qirinj për të paktën 14 persona, të cilët mendohet se kanë humbur jetën pafajësisht nga krimi vitet e fundit, të gjendur rastësisht apo si kalimtarë në atentate apo vrasje mafioze.
Pikërisht për të nxitur përgjegjësi nga autoritetet protestuesit ngjitën në muret e Ministrisë posterin me sloganin “Shqipëria i thotë jo krimit!”.
Organizimi i së mërkurës u mbajt pas thirrjeve që u shpërndanë gjerësisht në rrjetet sociale.
Ai erdhi si reagim ndaj ngjarjes së ndodhur më 30 tetor në Shkodër ku një atentat mafioz u mori jetën katër personave, dy prej të cilëve ishin thjesht kalimtarë të rastit.
Persona të paidentifikuar qëlluan me armë drejt makinës ku po udhëtonin Arlind Bushati e Hamza Lici. Ata humbën kontrollin dhe përplasën motorin me të cilin po lëviznin Bashkim e Flutura Basha.
Hamzai dhe Flutura vdiqën në vendngjarje, Arlindi ndërroi jetë dhjetë orë më vonë në spital, ndërsa Bashkimi pas katër ditësh.
Erisa Kryeziu ka përfunduar studimet e larta në Gazetari dhe Komunikim dhe Master Shkencor në Marrëdhënie me Publikun në Universitetin e Tiranës. Prej pesë vitesh është gazetare dhe menaxhere e projekteve pranë Citizens.al, ku raporton për çështje sociale dhe të drejtat e njeriut, veçanërisht për çështjet e të drejtave në punë, në arsim, barazinë gjinore, grupet e margjinalizuara, personat me aftësi të kufizuar si dhe për çështje mjedisore. Njëkohësisht punon edhe si koordinatore projektesh me fokus rininë dhe edukimin mediatik. Përdoruese e teknikave të reja të raportimit sikurse “Mobile Journalism” dhe e mjeteve të angazhimit qytetar në raportim (ECR-Engage Citizens Journalism).
