Aktivistë italianë dhe shqiptarë protestuan sot kundër marrëveshjes “Rama-Meloni”, që mbyll në kampin e Gjadrit emigrantët e paligjshëm që kapen në ujërat e Mesdheut.
“Stop deportimeve”, “Italisë nuk i detyrohemi asgjë”, “Marrëveshje antikushtetuese”, ishin disa nga thirrjet që u drejtuan nga aktivistët teksa një parrullë me mbishkrimin “No lager” kryesoi manifestimin, i cili nisi me një grumbullim para Kryeministrisë e më pas vijoi me marshim drejt “Europe House” dhe më tej para Ambasadës Italiane.
“Lager” njihet gjerësisht lloji i birrës së fermentuar në proces të ngadaltë, por në gjermanisht do të thotë kamp, depo apo magazinë. Gjatë Luftës së Dytë Botërore u përdor si nënkuptim për kampet e përqendrimit nisur nga shkurtimi i fjalës “Konzentrationslager”.
Me “No lager” aktivistët paralelizuan pikërisht këtë kuptim të kampeve naziste me atë çka po u bëhet emigrantëve që mbyllen në kampin e Gjadrit në Shqipëri.
Ky ishte organizimi i dytë i aktivistëve, pas marshimit që u mbajt të dielën para qendrës së pritjes në Shëngjin dhe kampit në Gjadër.
Organizimi dypalësh, nga aktivistët shqiptarë dhe italianë kundërshton bazën ligjore të kësaj marrëveshje, e cila deri më tani ka dështuar të zbatohet.
Javën e tretë të nëntorit, punonjësit socialë në kampin e Gjadrit u kthyen në Itali. Sipas “La Repubblica”, në Gjadër qëndruan vetëm 7 punonjës të “Medihospes”, organit drejtues të Qendrave Italiane në Shqipëri për riatdhesimin e emigrantëve.
Deri më tani në Gjadër janë mbyllur 24 emigrantë, por zhvendosja e tyre zgjati pak ditë pasi të gjithë janë kthyer mbrapsht në Itali, pas një vendimi të Gjykatës Evropiane të Drejtësisë për përcaktimin e shteteve të sigurta, vendim që gjeti zbatim nga Gjykata e Romës në shqyrtimet e procedurave të shpejtuara për azil.
Qeveria Meloni ka apeluar vendimin e Gjykatës së Romës në Gjykatë të Lartë, kjo e fundit pritet të shprehet më 4 dhjetor nëse do të pranojë apo jo shqyrtimin e rekursit nga qeveria.
Paralelisht shumica qeverisëse në Itali ka diktuar ndryshime ligjore, të cilat kërkojnë heqjen nga juridiksioni për shqyrtimin e kërkesave për azil të emigrantëve që përfshihen në paktin “Rama-Meloni” të Gjykatës së Romës. Qeveria italiane synon t’ia kalojë këtë juridiksion gjykatave të Apelit.
Lexoni gjithashtu:
- Kampi në Gjadër mbetet pezull, Italia diskuton për ‘plane shpëtimi’
- Italia kthen emigrantët nga Gjadri, plani i Melonit në pikëpyetje
- Pakti Meloni-Rama në krizë, emigrantë të tjerë kthehen në Itali
Ka kryer studimet në nivelin master në degën e Gazetarisë dhe Shkencave të Komunikimit në Universitetin e Tiranës. Ajo raporton prej më shumë se katër vitesh në Citizens.al mbi çështjet e kulturës, zhvillimit urban, feminizmit etj. Është kontributore gjithashtu në media të tjera vendase dhe të huaja on line, si dhe ka punuar në redaktimin e materialeve të ndryshme. Është autore e podastit “Pezull” në Citizens.al dhe është angazhuar si koordinatore e projekteve që lidhen me fuqizimin e gazetarëve të rinj dhe çështjet e migrimit.
