Kuvendi votoi sot 11 anëtarët e rinj të Këshillit Drejtues të Radio Televizionit Publik Shqiptar. Pavarësisht thirrjeve nga organizatat e medias, ndër emrat e votuar kaluan edhe ata me të shkuar në politikë.
Petrit Beci, Osman Mula, Bujar Kapexhiu, Robert Budina, Lorenc Vangjeli, Pano Xhixho, Rajmonda Bulku, Eno Civici dhe Alket Braho morën votat e deputetëtve duke fituar një vend në Këshillin Drejtues.
Mes Helidon Halitit dhe Fatjon Hoxhallit për pozicionin e Kryetarit të Këshillit Drejtues, me 74 vota “pro” u zgjodh Hoxhalli, kundrejt vetëm 10 votave që mori Haliti.
Qendra për Shkencë dhe Inovacion për Zhvillim (SCiDEV) dhe Asociacioni i Gazetarëve Shqiptarë (AGSH) ngritën shqetësimin pak ditë më parë se Bulku, Civici, Braho dhe Hoxhalli vinin nga një e shkuar me aktivitet të hapur politik si deputetë, zëvendësministër apo dhe këshilltarë.
“Parlamenti tregoi se interesat e ngushta partiake mbizotëruan mbi interesin publik […] i mohuan sot publikut mundësinë që RTSH të jetë një institucion dinjitoz dhe i pandikuar politikisht,” tha në një reagim AGSH.
“Ky aranzhim ndërpartiak rrezikon të vazhdojë politizimin e RTSH-së, në vend që të sigurojë autonominë e tij. Në parim, Këshilli i ri Drejtues duhej të ishte i lirë nga besnikëritë e ngushta partiake”, u tha në një deklaratë të mëparshme nga SCiDEV.
Zgjedhja e Këshillit të ri Drejtues vjen pas shkarkimit të atij të mëparshmit më 17 shkurt pas një periudhe tensionesh dhe akuzash për shkelje ligjore dhe mungesë transparence në menaxhimin e institucionit.
Kriza në RTSH përshkallëzoi pas dorëheqjes së Drejtorit, Alfred Peza, në shtator 2024, dhe problematikave të shfaqura në emërimin e drejtorit të ri.
Me një vonesë të pashpjeguar në hapjen e garës, Këshilli i shkuar, nuk aplikoi në janar rregullore dhe votë të fshehtë në përzgjedhjen dhe vlerësimin e kandidatëve, të cilëve nuk iu kërkua as dokument për pastërtinë e figurës.
Përzgjedhja e vetëm dy prej dhjetë kandidatëve të paraqitur për Drejtor të Përgjithshëm nuk mori shpjegime të qarta dhe nxiti spekulime për garë të paracaktuar ku në fazën finale u lanë Jetmir Shpuza dhe Aurora Polo, e cila aktualisht drejton RTSH-në si drejtuese e komanduar.
Pasi çështja kaloi në Komisionin e Medias, u vendos që të gjithë anëtarët të shkarkoheshin: Leka Bungo, Gëzim Podgorica, Genc Përmeti, Albert Minga, Ardita Reçi, Dionis Papadhimitri, Edmond Tullumani, Engjëll Ndocaj, Ilir Keko, Mevlan Shanaj dhe Milena Selimi.
Me emërimin e Këshillit të ri, shmanget situata e një krize edhe më të madhe, pasi në fund të muajit mars duhej që me firmë të Këshillit të miratohej buxheti i RTSH-së.
Lexo gjithashtu:
- Këshilli i ri Drejtues, organizatat e medias: RTSH rrezikon të kapet politikisht
- Kuvendi shkarkon Këshillin Drejtues të RTSH-së
- Kuvendi nis procedurën e shkarkimit të Këshillit Drejtues të RTSH-së
Erisa Kryeziu ka përfunduar studimet e larta në Gazetari dhe Komunikim dhe Master Shkencor në Marrëdhënie me Publikun në Universitetin e Tiranës. Prej pesë vitesh është gazetare dhe menaxhere e projekteve pranë Citizens.al, ku raporton për çështje sociale dhe të drejtat e njeriut, veçanërisht për çështjet e të drejtave në punë, në arsim, barazinë gjinore, grupet e margjinalizuara, personat me aftësi të kufizuar si dhe për çështje mjedisore. Njëkohësisht punon edhe si koordinatore projektesh me fokus rininë dhe edukimin mediatik. Përdoruese e teknikave të reja të raportimit sikurse “Mobile Journalism” dhe e mjeteve të angazhimit qytetar në raportim (ECR-Engage Citizens Journalism).
