Pas vite të tëra protestash në zonën e tyre, banorët e Kaçinarit zgjodhën sot të zhvendosen drejt Tiranës, me shpresën se zëri i tyre do të dëgjohet më shumë pranë institucioneve qendrore.
Ata kundërshtojnë ndërtimin e katër hidrocentraleve në lumin Shpërdhazë, projekt që sipas tyre prek jetën në pesë fshatra kreysore: Arrëz, Kaçinar, Simon dhe Shpërdhazë.
“Uji është jetë, mos na thani shpirtin” me këtë thirrje ata u mblodhën sot përpara ministrisë së Infrastrukturës dhe Energjisë, duke i kërkuar qeverisë pezullimin e menjëhershëm të punimeve.
Gjokë Beqiri, një prej banorëve pjesëmarrës, tha se nëse zonës i hiqet uji banorëve “do t’u merret fryma”.
“Prandaj ju lutem, i bëj thirrje dhe popullit të Kaçinarit, të mos e lëmë këtë punë” tha më tej ai.
Inxhinieri dhe përfaqësuesi i komunitetit, Gjon Pjetri, bëri thirrje për ndërhyrjen e Inspektoratit Kombëtar të Mbrojtjes së Territorit (IKMT) për ndalimin e projektit dhe lexoi një peticion që më pas u dorëzua në ministri.
Banorët përmendin disa arsye kryesore për kundërshtimin e projektit, përfshirë: mungesën e një procesi transparent vendimmarrjeje, mungesën e lejes mjedisore për kompaninë ndërtuese “Shpërdhaza Energji SHPK”, ndikimin negativ në jetesën e përditshme dhe faktin që kanioni i lumit është një monument natyror i mbrojtur me ligj.
“Nuk kemi gjetur zgjidhje, e nuk jemi dëgjuar! Prandaj sot kemi ardhur këtu, para qeverisë, të ngremë zërin për pasuritë tona, siç janë uji, tokat, trojet, mullinjtë, stanet e bjeshkët tona” u shpreh Kolë Ndoji një tjetër banor pjesëmarrës në protestë.
Ndër vite, banorët kanë arritur ta pengojnë vazhdimin e projektit. Në 2018 punimet u pezulluan pas protestave, ndërsa në 2019, mjetet e kompanisë u dogjën në një akt që çoi në ndërprerjen e punës.
Banorët akuzojnë firmën për falsifikim dokumentesh për marrjen e lejeve – një çështje që aktualisht ndodhet në gjykatë, pa një vendim përfundimtar.
Në fund të protestës një përfaqësi e banorëve u prit në zyrat e ministrisë nga ministrja Belinda Balluku.
Lexoni gjithashtu:
- Mirditë: Banorët e Kaçinarit në protestë kundër HEC-eve
- Mirditë: Makineritë e HEC-eve kthehen në Kaçinar nën rojen policore
Ka kryer studimet në nivelin master në degën e Gazetarisë dhe Shkencave të Komunikimit në Universitetin e Tiranës. Ajo raporton prej më shumë se katër vitesh në Citizens.al mbi çështjet e kulturës, zhvillimit urban, feminizmit etj. Është kontributore gjithashtu në media të tjera vendase dhe të huaja on line, si dhe ka punuar në redaktimin e materialeve të ndryshme. Është autore e podastit “Pezull” në Citizens.al dhe është angazhuar si koordinatore e projekteve që lidhen me fuqizimin e gazetarëve të rinj dhe çështjet e migrimit.
