Një raport vlerësimi i qendrës Altax thotë se premtimet e partive kërkojnë disa dhjetëra miliardë euro që të realizohen, në një vend ku buxheti i shtetit është në masën 7-8 miliardë euro çdo vit.
Partia Socialiste premton rritje pensionesh, pagash, buxhet më të madh për arsimin dhe bujqësinë. Kjo mund të kërkojë rreth 35 miliardë euro në 4 vite. Ndaj duket e vështirë të realizohen.
Premtimet e Aleancës “Shqipëria Madhështore”, kërkojnë rreth 29 miliardë euro në një mandat qeverisës. Ndaj njësoj si premtimet e PS-së vlerësohen të vështira për t’u realizuar.
Analiza e Altax ka nxjerrë si program më të realizueshëm, atë të Lëvizjes Bashkë, 162 premtimet e së cilës për ndryshime në bujqësi, industri, kulturë dhe arsim kërkojnë rreth 13 miliardë euro.
Koalicioni “Nisma-Shqipëria Bëhet” ka gjithashtu një program që vlerësohet i realizueshëm nga Altax, edhe pse 218 premtimet e tyre kërkojnë një buxhet prej rreth 25 miliardë eurosh.
Partia “Mundësia” ka një program me më pak premtime, 59 të tilla, ku synon shkurtimin e buxhetit shtetëror me uljen e shpenzimeve për të lehtësuar ekonominë me synim mirëqenien e qytetarëve. Ekspertët e kanë vlerësuar në masën 82% të realizueshëm si program me një kosto prej rreth 6.4 miliardë eurosh.
Në kohë fushate, Shqipëria ka parë shumë udhëheqës që premtojnë pafund gjëra, shpesh duke e ditur se janë të parealizueshme. Edhe këto zgjedhje nuk kanë shpëtuar pa një qasje të tillë.
Lexoni gjithashtu:
- Çfarë na thonë sloganet këto zgjedhje?
- Dezinformimi në fushatë zgjedhore
- Majtas apo djathtas, ku qëndrojnë partitë?
Ka kryer studimet e nivelit master në Gazetari Investigative në Departamentin e Gazetarisë në Universitetin e Tiranës. Prej pesë vitesh punon si gazetare, ku më herët ka mbuluar çështje të politikës dhe aktivitetit parlamentar, në median e shkruar dhe atë online. Aktualisht është gazetare pranë Citizens.al, ku mbulon çështje të ndryshme sociale që lidhen me transparencën e institucioneve. Në Citizens.al udhëheq podcastin “Të Padëgjuarit” dhe është e angazhuar si menaxhere e projekteve që lidhen me mbështetjen e gazetarisë investigative.
