Qëndresa Qytetare dhe Organizata për Rritjen e Cilësisë në Arsim organizuan sot aksionin “Kundër Plagjiaturës të përbashkuar”. Në këtë aksion u denoncuan plagjiaturat e dy ministrave të arsimit, përkatësisht Evis Kushi në Shqipëri dhe Ramë Likaj në Kosovë.

“Dy ministrat e vendit tonë gjenden të akuzuar për plagjiaturë dhe sigurisht që plagjiatura është vjedhje, vjedhje e pronësisë intelektuale dhe si pasojë plagjiatori është hajdut”, ka deklaruar aktivisti i “Qëndresës Qytetare” Migen Qiraxhi.

Fillimisht pjesëmarrësit nuk janë lejuar nga forcat policore ti afroheshin ambasadës së Kosovës në Shqipëri, veprim që u cilësua nga aktivistët si pengesë e së drejtës për të folur dhe protestuar, duke qenë se edhe kërkesa për tubim ishte refuzuar nga policia.

Gjatë fjalimit të mbajtur përpara mediave Migen Qiraxhi theksoi se pavarësisht akuzave për plagjiaturë ndaj ministrave Likaj dhe Kushi, asnjëri prej tyre në asnjë moment nuk ka sqaruar çështjen e integritetit të tyre akademik.

Kjo situatë është vlerësuar si e pajustifikueshme nga përfaqësuesit e QQ dhe ORCA lidhur dhe me gjendjen e arsimit në dy vendet shqiptare.

“Theksoj se testi Pizës i cili mat nivelin e nxënësve parauniveristar, nxënësit shqiptarë dhe kosovarë janë nën mesataren e nivelit global dhe sa i përket arsimit të lartë dhe shkencës Kosova dhe Shqipëria kanë mesataren më të ulët të prodhimit shkencor në rajon” ka shtuar Rron Gjinovci përfaqësues i ORCA në Kosovë.

Gjatë deklaratës së mbajtur është folur edhe për takimin e dy qeverive që pritet të ndodhë javën në vijim, por ky takim është cilësuar i padobishëm për arsimin në vend, madje është cilësuar si unifikim i antivlerave për arsimin e Shqipërisë dhe Kosovës.

“Ky aktivitet dëshiron të ftoj qytetarët shqiptarë që të për bashkohen, siç e shpreh dhe himni jonë kombëtar, por kësaj here kundër plagjiaturës” ka theksuar Qiraxhi.

Sipas tij rinia e Kosovës dhe e Shqipërisë duhet të bëhet bashkë kundër çdo lloj vjedhje, gënjeshtre për të marrë pozicione të qarta për emancipimin shoqëror dhe kombëtar.

Në fund një aktiviste e Qëndresës Qytetare recitoi himnin kombëtar, jo në tekstin origjinal, por në një tekst të përshtatur kundër plagjiaturës në arsim.

“Ky është himni kombëtar që i dedikohet arsimit sepse ne mendojmë që arsimi ynë i vetëm është arsimi i mirëfilltë” përfundoi aktivisti Qiraxhi.

Prej lufte veç ai largohet

Që i pushtetit është shërbëtor

Kush luftën bën e nuk dorëzohet

Synon një komb arsimor.

Në dorë pankartat do t’i mbajmë

Ta mbrojmë dijen në çdo kënd,

Të drejtat tona ne s’i ndajmë

plagjiatorëve s’u lëmë vend.

Elira Kadriu