Dje pasdite qindra qytetarë protestuan përpara Kryeministrisë kundër rritjes së çmimit të naftës. Fillimisht aktivistë të ndryshëm artikuluan kërkesat e tyre mbi heqjen e taksave, më pas pjesëmarrësit të organizuar në grupime bllokuan akse të ndryshme të rrugëve kryesore.

Pas protestave të ditës së djeshme sot qytetarët dhe aktivistët e kanë cilësuar si një fitore të vogël rënien e cmimit të naftës, që sot ka shënuar 240 lekët.

Citizens Channel kontaktoi me qytetarë të vendeve të ndryshme të rajonit për të mësuar nivelin e çmimeve të karburantit.

Nikolina Damjanic na dërgon një foto nga qyteti i Banja Luka në Bosnje Hercegovinë dhe sipas fotos mund të lexojmë se vlera e naftës Diesel është 2.95 marka, e barabartë me 186.22 lekë.

“Ne kemi një ligj të hartuar para katër vitesh që definon çmimin e karburanteve. Tani me rritjen e çmimit situata është problematike dhe presim ndryshim të legjislacionit”, shprehet Damjanic.

Në Kosovë nafta arriti vlerën në 1.76 euro apo 217.07 në lekë shqiptare.

“Ngritja e çmimit të karburanteve është në vazhdën e ngritjes së çmimeve të tjera. Kuptohet që kjo vjen si pasojë e konfliktit në Ukrainë por mbi të gjitha ajo çfarë po bëjnë qeveritë e rajonit është që të hiqet akciza, që çmimi të jetë pak më i përballueshëm për qytetarët”, thekson aktivisti Valdon Bytyci.

Sipas një fotografie të dërguar në redaksinë tonë nga qyteti Shkupit çmimi i naftës arrin në 91.50 denarë apo ndryshe 183.89 lekë.

” Sot me një vendim të ri nga qeveria do të ketë zbritje të çmimit”, thotë A.T nga Maqedonia e Veriut.

Ndërsa çmimi i naftës sot në Beograd ka arritur 193.9 dinar ose 204.14 lekë.

Në Malin e Zi nafta ka arritur  çmimin 1.450 euro e barabartë me 178.37 lekë.

Elira Kadriu

Ka kryer studimet në nivelin master në degën e Gazetarisë dhe Shkencave të Komunikimit në Universitetin e Tiranës. Ajo raporton prej më shumë se katër vitesh në Citizens.al mbi çështjet e kulturës, zhvillimit urban, feminizmit etj. Është kontributore gjithashtu në media të tjera vendase dhe të huaja on line, si dhe ka punuar në redaktimin e materialeve të ndryshme. Është autore e podastit  “Pezull” në Citizens.al dhe është angazhuar si koordinatore e projekteve që lidhen me fuqizimin e gazetarëve të rinj dhe çështjet e migrimit.