Pedagogë dhe punonjës të universiteteve protestuan sot përballë Universitetit Politeknik të Tiranës. Ata kërkuan nga qeveria rritje të pagës me 50% për dy vite.
Më herët pedagogët dhe përfaqësuesit e Sindikatës së Punonjësve të Universiteteve të Shqipërisë mbajtën një protestë paralajmëruese tek Fakulteti i Shkencave të Natyrës, duke i drejtuar qeverisë një peticion për të cilin nuk morën përgjigje.
Në 15 shtator ata lajmëruan se nëse kërkesat e tyre nuk do merrnin përgjigje do të mblidheshin më shumë përballë UPT-së.
“Kërkesat e pedagogëve dhe përgjigja e qeverisë”
Përpos rritjes së pagave, sindikata dhe pedagogët kërkojnë:
- Rritjen e financimit për kërkimin shkencor;
- Rivendosjen e shtesave mbi pagë për ‘Dëmshmëri shëndeti në punë’;
- Rritjen e shtesës mbi pagën për vjetërsinë në punë ;
- Rritjen e pagesës së orëve të ngarkesës suplementare;
- Rivlerësimin e orës mësimore pasi ka zbritje prej 50% të pagesës së orës mësimore si rezultat i mosdiferencimit të orës mësimore të leksionit.
- Rishikimin e tatimit prej 23% mbi pagesën e ngarkesës suplementare
- Pezullimin deri më 2026 të pikës c) të paragrafit të 3, i Kreut III të VKM Nr.112, datë 23.2.2018 për kriteret e marrjes së titullit “Profesor”.
- Të bëhet transparencë mbi buxhetin dhe të ardhurat e universitetet publike.
Gjatë kohës që po zhvillohej protesta e pedagogëve, kryeministri Edi Rama mbajti një takim tek Universiteti Bujqësor i Tiranës.
Nga aty Rama ktheu një përgjigje për protestën e pedagogëve duke thënë se qeveria mund të bëjë vetëm rritje me 7%.
Të njejtin qendrim mbajti edhe ministrja e arsimit Evis Kushi.
“Kufiri minimal i rritjes është 7 për qind dhe maksimal 15 për qind. Universitet me autonominë mund të propozojnë rritje mbi kufirin minimal që mund ta mbulojnë me të ardhurat e tyre”, tha Kushi.
Por gjatë deklaratave të tyre, pedagogët u shprehën se kërkesa e tyre është e panegociueshme.
Kryetari i Sindikatës së punonjësve të Universiteteve të Shqipërisë, Aleksandër Kovaçi
“Ne qëndrojmë në shifrën 50% për dy vite. Kjo është e panegociueshme se është minimale. Ju kemi dërguar dhe tabelën e pagave”, tha kryetari i sindikatës Aleksandër Kovaçi.
Ka mbaruar studimet e nivelit Bachelor në “Gazetari Politike” në Universitetin e Tiranës dhe aktualisht ndjek studimet e nivelit master për “Gazetari Investigative” në Fakultetin e Historisë dhe Filologjisë. Prej tre vitesh ka punuar si gazetare në median e shkruar dhe atë online, si dhe ka qenë e angazhuar si aktiviste kryesisht në kauzat studentore. Aktualisht është gazetare pranë Citizens Channel