Ndryshimet në ligjin “Për të Drejtën e Informimit” u miratuan pa debate të hënën në komisionin parlamentar të ligjeve, me votën e deputetëve të mazhorancës pasi opozita mungoi në mbledhje.
Ligji “Për të Drejtën e Informimit”, po ndryshohet për herë të parë që pas miratimit në vitin 2014. Ndryshimet janë pritur me kritika nga aktorë të medias dhe shoqërisë civile.
Propozimi i hedhur për konsultim fillimisht nga Ministria e Drejtësisë parashikon një sërë ndryshimesh thelbësore si ulja e gjobave ndaj autoriteteve publike, shtimi i pagave për koordinatorët e të drejtës së informimit dhe prezantimin e konceptit të kërkesave abuzive apo me karakter përsëritës. Por ky propozim u ndryshua më vonë pas kritikave nga media dhe shoqëria civile për t’u tërhequr nga neni për “kërkesat e abuzive”.
Ministri i Drejtësisë Ulsi Manja prezantoi të hënën në komision ndryshimet, duke i konsideruar ato si nevojë për të rritur më tej aksesin e publikut në informacionin e Administratës Publike.
Manja u shpreh se ligjit aktual i mungojnë mekanizmat për zbatimin e vendimeve të komisionerit.
Ndryshimet në ligj të propozuara nga Ministria e Drejtësisë janë kritikuar nga ekspertët e fushës të cilët vlerësuan se kërkesat abuzive dhe gjobat nuk kanë qenë problemi kryesor i ligjit të vjetër.
“Kemi marrë në konsideratë sugjerimet e medias dhe shoqërisë civile, që e konsideronin këtë nen si kufizim i të drejtës për informim”, u shpreh Manja në komision.
Sipas ndryshimeve të reja në ligj, komisioneri pas hetimit mund të vendos gjoba ndaj titullarit të instiitucionit apo zyrtarit i cili nuk ka penguar dhënien e informacionit.
Ka kryer studimet e nivelit master në Gazetari Investigative në Departamentin e Gazetarisë në Universitetin e Tiranës. Prej pesë vitesh punon si gazetare, ku më herët ka mbuluar çështje të politikës dhe aktivitetit parlamentar, në median e shkruar dhe atë online. Aktualisht është gazetare pranë Citizens.al, ku mbulon çështje të ndryshme sociale që lidhen me transparencën e institucioneve. Në Citizens.al udhëheq podcastin “Të Padëgjuarit” dhe është e angazhuar si menaxhere e projekteve që lidhen me mbështetjen e gazetarisë investigative.
